सञ्जालहब
२९ असार- काठमाडौं, नेपाल विद्युत् प्राधिकरणको सञ्चालक समितिको बैठकबाट नेपाल विद्युत् प्राधिकरणका कर्मचारीको सरुवा र बढुवा सञ्चालक समितिले गर्ने भनेर प्रक्रिया अगाडि बढाएपछि प्राधिकरणका कर्मचारीले धर्ना सुरु गरेका छन् ।
नेपाल विद्युत् प्राधिकरण भित्र ऊर्जा मन्त्रीको बढ्दो हस्तक्षेप र कार्यकारी निर्देशकको अधिकार कटौती गर्ने प्रयासका विरुद्ध क्रियाशील ट्रेड युनियनहरू आन्दोलनमा आएका हुन् ।
प्राधिकरणको मिति २०८२ असार २२ गते बसेको सञ्चालक समितिको बैठकमा मन्त्रीले मनोमानी ढङ्गले एजेन्डा पेस गरी कार्यकारीको अधिकार आफूमा केन्द्रित गर्न खोजेको भन्दै सत्तारुढ र प्रतिपक्षी दल निकट चार वटै ट्रेड युनियनहरुले संयुक्त विज्ञप्ति निकालेका हुन ।
ट्रेड युनियनहरूले ऊर्जा मन्त्रीले कर्मचारी सरुवामा समेत अनुचित हस्तक्षेप गरेको आरोप लगाएका छन् ।
असार २२ गते सबेको सञ्चालक समितिको बैठकमा छलफलका लागि राखिएका कुनै पनि एजेन्डामा छलफल नगरी प्राधिकरणका सबै कर्मचारीको चासो जोडिएको कर्मचारी सेवा सर्त नियमावली संशोधनको विषयमा मात्र छलफल गरिएको थियो । सञ्चालक समितिको बैठकमा एजेन्डा प्रस्तुत गर्ने अधिकार कार्यकारी निर्देशकलाई नै हुन्छ ।
तर, यसबारे कुनै जानकारी नदिई सञ्चालक बलबहादुर पराजुलीको संयोजकत्वमा गठन भएको कमिटीको प्रतिवेदनमाथि छलफल भएको थियो । यस छलफलको मुख्य उद्देश्य नै कार्यकारी निर्देशकको कर्मचारी सरुवाको अधिकार कटौती गर्नु रहेको ट्रेड युनियनहरू भनाइ छ ।
प्राधिकरणका कार्यकारी निर्देशकको अधिकार कटौती तथा मनोमानी ढङ्गबाट सञ्चालक समिति सञ्चालन गर्न खोज्ने मन्त्रीको प्रवृत्ति प्रति गम्भीर ध्यानाकर्षण भएको नेपाल विद्युत् प्राधिकारका कर्मचारी युनियनले बताएका छन ।
प्रतिक्रिया दिनुहोस्