करिव ३९ केजी गाँजासहित एक जना पक्राउ, एक जना फरार

१ मंसिर- सर्लाही, करिव ३९ केजी गाँजासहित एक जना पक्राउ परेका छन् ।

विशेष सूचनाका आधारमा जिल्ला प्रहरी कार्यालय सर्लाहीबाट रातभर खटिएको प्रहरी टोलीले जिल्लाको लालबन्दी नगरपालिका – ६ स्थित शिव मन्दिर नजिकबाट करिव ३८ किलो ८९० ग्राम गाँजासहित एक जनालाई पक्राउ गरेको छ ।

प्रहरीले हरिवन नगरपालिका – १, पटौनाका ५५ वर्षीय बद्रीबहादुर श्रेष्ठलाई गाँजासहित पक्राउ गरेको छ । उनलाई उक्त परिमाणको गाँजासहित बिहान करिब ५ बजे पक्राउ गरिएको हो । प्रहरीले प्रदेश – २ – ०३००१ ह ३२८ नम्बरको अटो र ना ६० प ५५६ नम्बरको मोटरसाइकलबाट गाँजा बरामद गरेको हो ।लखन्देही खोलातर्फबाट भित्री बाटो हुँदै गाँजा ल्याइँदै गरेको जानकारी पाएपछि प्रहरी शिव मन्दिर क्षेत्र वरपर तैनाथ भएको थियो ।

अटोमा एक पोका र मोटरसाइकलमा छ पोका गाँजा बरामद भएको छ । पक्राउ परेका बद्री बहादुर अटोमा सवार थिए भने मोटरसाइकलमा रहेका व्यक्ति घटनास्थलबाट फरार भएको र उनीहरूको खोजी जारी रहेको प्रहरीले जनाएको छ ।