लेक लागेर हाट बजार गएका एकजनाको मृत्यु

५ भदौ – मुगु,  लेक लागेर हाट बजार गएका एकजनाको मृत्यु भएको छ।

तिब्बतको ह्याजीमोरामा सुरू भएको हाट बजारमा पुगेका मुगु कार्मारोङ गाउँपालिका-२ मुगुम गाउँका स्थानीय हाल जुम्ला जिल्ला चन्दनाथ नगरपालिका बसोबास गर्दै आएका अन्दाजी ४५ वर्षीय साग्वु लामाको लेक लागेर मृत्यु भएको जिल्ला प्रहरी कार्यालयले जनाएको छ

गाउँलेसँग उक्त हाट बजारमा पुगेका लामालाई श्वासप्रश्वासमा समस्या भएपछि उद्दारका लागि स्रिम्रिक एयरको हेलिकोप्टर बोलाइएकोमा हेलीकोप्टर नपुग्दै लामाको मृत्यु भएको थियो। मृतकको परिवार जुम्ला भएकाले शव हेलिकोप्टरमार्फत जुम्ला लगिएको छ ।

हरेक वर्ष साउन अन्तिम साता भदौको पहिलो साता नेपाल-तिब्बत सिमा क्षेत्रमा पर्ने तिब्बतको ह्याजीमोरामा हाट लाग्ने गर्दछ । यो हाटमा कार्मारोङ गाउँपालिका१ देखि ८ वडा सम्मका स्थानीयहरू आफूलाई वर्ष भरी पुग्ने खाद्यान्न लत्ता कपडालगायत सामग्री खरिद गर्ने गर्दछन्।

स्थानीयहरू आफूले संकलन गरेका यार्सा,वनलसुन,जडिबुटीलगायत स्थानिय उत्पादन खाद्यान्न तथा लत्ता कपडा लगेर हाट बजारमा बेच्ने गर्छन्।