कारागारमा मारिएका चौधरीको शव आफन्तले बुझे

२६ साउन- कैलाली, कारागारमा मारिएका भरत चौधरीको शव आफन्तले बुझेका छन्।

धनगढी उपमहानगरपालिका–४ का ३७ वर्षीय भरत चौधरीको शव चार दिनपछि आफन्तले बुझेका हुन्।
आफ्न्तहरुले माग सम्बोधन भएपछि मात्रै शव बुझ्ने बताएका थिए। मृतकका परिवारले हत्यामा संलग्न कैदीबन्दीको पहिचान गरी कारबाहीको दायरामा ल्याउनुपर्ने, उनकी १५ वर्षीया छोरीलाई सरकारले निःशुल्क शिक्षाको व्यवस्था गर्नुपर्ने लगायतका मागहरू राखेका थिए ।

प्रमुख जिल्ला अधिकारी हमाल माग सम्बोधन गर्न तयार भएपछि आफूहरूले शव बुझेको मृतकका भाइ विजय चौधरीले बताए। छलफल पछि जिल्ला प्रहरी कार्यालयका मृतकका परिवारले जाहेरी पनि दिएका छन्। उक्त जाहेरी दर्ता भएर अनुसन्धान अघि बढिसकेको जिल्ला प्रहरी कार्यालय कैलालीले बताएको छ। जाहेरी दर्ता पछि मृतकका आफन्तहरू शव बुझ्न तयार भएका हुन।