रुबीको हत्यामा संलग्न रहेका प्रेमीको पनि मृत्यु

११ भदौ- रौतहट, रुबीकुमारी साहको हत्यामा संलग्न रहेका प्रेमी लक्ष्मण पासवानको मृत्यु भएको छ।

उनको उपचारको क्रममा कीर्तिपुर बर्न अस्पतालमा मृत्यु भएको हो । पासवान आफैँले बुधबार बिहान आगो लगाएपछि स्थानीयले उद्धार गरेका थिए ।

पासवानले आगो लगाएको कुरा स्थानीयले प्रहरीलाई खबर गरेपछि प्रहरी चौकी माधोपुरको टोलीले माधोपुरदेखि पश्चिम शिवनगर जाने बाटोमा राजदेवी मन्दिर नजिकबाट उद्धार गरी उपचारका लागि गरुडास्थित बेटर नेपाल अस्पताल पुर्‍याएको थियो । गरुडामा उपचार सम्भव नदेखिएपछि पासवानलाई थप उपचारका लागि बर्न अस्पताल कीर्तिपुर रिफर गरिएको थियोे । पक्राउ परेका पासवानले गरुडास्थित अस्पतालमा उपचारमा संलग्न डाक्टरलाई बताए अनुसार झगडा परेपछि रुबिको हत्या गरेको थिए ।

रुबी साहको हत्यारा लक्षमण पासवान नै रहेको अहिलेसम्मको अनुसन्धानले देखाएको प्रहरीले जनाएको छ । प्रहरीका अनुसार मलेसियाबाट पासवानले ल्याएको सुटकेश र डोरी हत्यामा प्रयोग गरिएको थियो । प्रहरीले आफूलाई कारबाही गर्न नसक्ने भन्दै १० वर्ष वा २० वर्षको जेल सजाय आफूले गरेको अपराधको सजाय नभएको भन्दै मरेर रुबी नजिक जानु नै आफ्नो अन्तिम लक्ष्य रहेको पासवानले बोलेको भिडियोमा रहेको छ ।

पासवानले छातिमा प्रेमिका रुबीको ट्याटु बनाएका छन् भने हातमा समेत माई हर्ट रुबीकुमारी नामको ट्याटु बनाएका थिए । विद्यालय पढ्दादेखि नै रुबीसँग प्रेम परेको मर्नु अघि पासवानले बनाएको भिडियोमा बोलेका छन्।

सामाजिक संजालमा अपलोड गरिएको उक्त भिडियोमा रुबी साह हत्याका आरोपित पासवानले रुबीको आमा, भिनाजु र देवरमाथि गम्भीर आरोप लगाएका छन् । पासवानको भिडियो अनुसार रुबिकी आमा, भिनाजु र देवरले रुबिलाई पैसाको लोभमा अनैतिक सम्बन्ध बनाउन बारम्बार दबाब दिने गरेको र त्यही कारण रुबी चिन्तामा हुँदा आफुहरूमा झगडा हुने गरेको बताएका छन् ।

हत्यापछि रुबिलाई सुटकेशमा राखेको अवस्थामा प्रहरीले गौर गङ्गापिपरा सडक खण्डको मुडवलबाबाट शनिबार राति फेला पारेको थियो ।