सञ्जालहब
९ मंसिर- काठमाडौं, भदौ २३–२४ गतेको जेनजी आन्दोलनमा भएको जनधनको क्षतिकाबारे छानबिन गर्न गठित उच्चस्तरीय न्यायिक जाँचबुझ आयोगलाई नेपाली सेनाले दुई दिनको विस्तृत विवरण पठाएको दाबी गरेको छ ।
“नेपाली सेनाले गत भदौमा जेनजी आन्दोलनका क्रममा देशमा जे–जस्ता घटना भए त्यसको विस्तृत विवरण जाँचबुझ आयोगलाई पठाइसकेका छौँ,“हामीले एक साताअघि नै विस्तृत विवरण आयोगलाई उपलब्ध गरेका हौँ, नेपाली सेनाका प्रवक्ता सहायक रथी राजाराम बस्नेतले भनेका छन ।
जेनजी आन्दोलन क्रममा देशभर ठूलो जनधनको क्षति भएको थियो । प्रदशर्नकारीले सिंहदरबार, संसद् भवन, सर्वोच्च अदालत, प्रधानमन्त्री कार्यालय, राष्ट्रपति कार्यालयलगायत सरकारी, व्यावसायिक तथा निजी भवनमा तोडफोड र आगजानी गरेका थिए । त्यस्तै, ७६ जनाको ज्यान गएको थियो । प्रदर्शन उग्र बनेपछि सेनाले भदौ २४ गते राति १० बजेपछि देशको सम्पूर्ण सुरक्षा व्यवस्था आफ्नो हातमा लिँदै हिंसात्मक प्रदर्शन नियन्त्रण गरेको थियो ।
आन्दोलनमा ठूलो जनधनको क्षति भएपछि प्रधानमन्त्री नियुक्त भएलगत्तै कार्कीले भदौ २३ र २४ कोे जनधनको क्षतिबारे छानबिन गर्न पूर्वन्यायाधीश गौरीबहादुर कार्कीको अध्यक्षतामा उच्चस्तरीय न्यायिक जाँचबुझ आयोग गठन गरेकी थिइन् । आयोगले जेनजी आन्दोलनमा भएको जनधनको क्षतिबारे छानविन गर्ने क्रममा सम्बन्ध व्यक्ति र संस्थासँग सोधपुछ गरिरहेको छ । यसैक्रममा आयोगले नेपाली सेनासँग पनि विवरण माग गरेको थियो ।
“आयोगसँग हाम्रो राम्रो समन्वय र सहकार्य भइरहेको छ । आयोग र सेनाबीच कुनै समस्या छैन,” सैनिक प्रवक्ता बस्नेतले भने, “संस्थाका हिसाबले जेनजी आन्दोलनको विवरण हामीले तयार पारेका थियौं । आयोगले मागेपछि पठाइसकेका छौं ।” उच्चस्तरीय न्यायिक जाँचबुझ आयोगका प्रवक्ता विज्ञानराज शर्माले पनि जेनजी आन्दोलनका सम्बन्धमा सेनासँग विवरण मागिएको बताए ।
“हामीले सेनासँग विवरण मागेका थियौं । उसले केही विवरण पठाएको छ, अझै पूरा विवरण आइसकेको छैन,” आयोगका प्रवक्ता शर्माले बताए । सेनाले पठाएको विवरणमा रहेका केही कुरामा स्पष्टता चाहिएको हुँदा थप केही जानकारी मागिएको र त्यसको जवाफ आउने क्रममा रहेको प्रवक्ता शर्माले बताए ।
प्रतिक्रिया दिनुहोस्