आठ लाख बढिको भन्सार छलीको अवैध सामान बरामद

९ मंसिर -काठमाडौं, कञ्चनपुर र दार्चुलाबाट प्रहरीले आठ लाख बढिको भन्सार छलीको अवैध सामान बरामद गरेको छ।

सोमवार कञ्चनपुर जिल्लाका विभिन्न स्थान भिमदत्त नगरपालिका–४ स्थित चम्मन चोक, मदन चोक, वडा ११ भुजेला तथा पुनर्वास नगरपालिका–४ कोटीहोम नजिक शाहीचोक क्षेत्रमा भन्सार छली गरी ल्याइएका ठूला परिमाणका सामान प्रहरीले बरामद गरेको छ। जिल्ला प्रहरी कार्यालय कञ्चनपुर तथा मातहत युनिटबाट खटिएको गस्ती टोलीले बेवारिसे अवस्थामा छाडिएका अन्दाजी सात लाख ८० हजार सात सय बराबरका चिनी, गहुँ, मकै, विभिन्न किसिमका कपडा, किराना सामान तथा २ थान मोटरसाइकल लगायतका सामग्री बरामद गरेको प्रहरीले जनाएको छ।

यस्तै, दार्चुलाको महाकाली नगरपालिका–४ बसपार्क क्षेत्रमा अबैध रूपमा भारतबाट भन्सार छली गरी ल्याइएका सामान प्रहरीले बरामद गरेको छ। जिल्ला प्रहरी कार्यालय दार्चुलाबाट खटिएको टोलीले ४३ हजार ३ सय रुपैयाँ बराबरको बिडी, स्विटर, सुटपिस, चप्पललगायतका सामग्री बेवारिसे अवस्थामा फेला पारी बरामद गरेको जनाएको छ।