घर फर्कँदै गरेका यात्रु बीच बाटोमै लुटिए

२७ भदौ- कञ्चनपुर, भारतबाट फर्कँदै गरेका यात्रु बिहीबार बीच बाटोमै लुटिएका छन्। उनिहरु भारतको उत्तराखण्ड टेहरीगढवालबाट आँउदै थिए ।

पूर्वपश्चिम राजमार्गको शुक्लाफाँटा राष्ट्रिय निकुञ्जको अर्जुनी क्षेत्रमा तीन जना सेतो रङको स्कुटरमा आएका अपरिचित व्यक्तिले हतियार देखाई कालिकोट जिल्ला पलाता गाउँपालिका–७ का कलमबहादुर धामी र नैनबहादुर धामीलाई लुटेका हुन्।

“सवारीसाधन नपाएपछि महेन्द्रनगरबाट पैदल हिँडेका मानिसहरु तीन जना स्कुटरमा आएका अपरिचित व्यक्तिले खुकुरी देखाउँदै मोबाइल खोसे। त्यसपछि उनिहरुको साथमा रहेको १४ हजार भारु पनि खोसे। राजमार्गमा अर्को यात्रु चढेको मोटरसाइकल नजिकै आउन थालेको देखेपछि भागे। लुटिनेमा नैनबहादुरसँगै सिंहराज खत्री, कलबहादुर खत्री र अभिराज धामी पनि थिए।

दुई जनालाई लुटेराहरूले लुटे पनि तीन जना भने लुटिनबाट जोगिएका छन्। उनिहरु भारतमा मजदुरीका लागि दुई महिनाअघि मात्र गएका थिए । कलमबहादुरले भने, “भारतमा पनि गतिलो मजदुरीको काम पाइएन, काम पाइए पनि कहिले बाढी, कहिले वर्षाले काम गर्न नपाइएपछि फर्केका हौँ, बीच बाटोमै लुटिएपछि बिचल्लीमा परेका छौँ।”

लुटपाट भएकोबारे इलाका प्रहरी कार्यालय झलारीमा जानकारी गराइएको नैनबहादुरले बताए। प्रहरीले पीडितले दिएको हुलियाका आधारमा लुटेराहरूको खोजतलास भइरहेको बताए।