ट्रकको ठक्करबाट एक जनाको मृत्यु, एकजना घाइते

२० भदौ- सिन्धुली, आज बिहान ट्रकको ठक्करबाट एक जनाको मृत्यु भएको छ भने अर्का एक जना घाइते भएका छन् । घटना कमलामाई नगरपालिका–९ बथानचौडी नजिक मदन भण्डारी राजमार्गमा भएको हो ।

विराटनगरबाट काठमाडौँतर्फ जाँदै गरेको ट्रकले आज बिहान बाटोमा हिँडिरहेका भुवन भुजेल र टेकप्रसाद दाहाललाई ठक्कर दिँदा भुजेलको मृत्यु भएको हो भने घाइते भएका दाहालको स्थानीय अस्पतालमा उपचार भइरहेको छ ।

बटुवालाई ठक्कर दिएपछि नियन्त्रण गुमाएको ट्रक सडक किनारको घरमा ठोक्किँदा गारो ढलेको छ भने घरपालुवा २० वटा पन्छी मरेका छन् । ट्रक र त्यसका चालकलाई प्रहरीले नियन्त्रणमा लिएको छ ।