विवाह गर्ने आश्वासन दिएर युवकको हत्या, बुवा आमा पनि संलग्न

११ भदौ- दैलेख, गत साउनमा छामघाट खोला किनारामा मृत भेटिएका सुरेन्द्रबहादुर शाहीलाई योजनावद्धरुपमा हत्या गरी खोलामा फालेको प्रहरी अनुसन्धानबाट खुलेको छ । विवाह गर्ने आश्वासन दिएर युवकको हत्या भएको छ ।

११ साउन २०८२ मा वैदेशिक रोजगारीका सिलसिलामा मलेसियाबाट ३३ महिनापछि फर्केका दैलेख चामुण्डाबिन्द्रासैनी नगरपालिका–६, का २८ वर्षीय शाही जिल्लाकै दुल्लु नगरपालिका–११, कयलकुनास्थित छामघाट खोला किनारमा मृत भेटिएका थिए । शंकास्पद अवस्थामा शाही मृत फेला परेपछि दैलेख प्रहरीले अनुसन्धान थालेको थियो । विवाह गर्ने आश्वासन दिएकी युवतीको धोकाधडीमा शाहीले ज्यान गुमाउनु परेको प्रहरी अनुसन्धानबाट खुलेको छ ।

शाहीको हत्यामा उनकी प्रेमिका भनिएकी गंगा वन र उनका बुवाआमा संलग्न भएको पाइएको छ । शाहीको हत्यापछि सुराक पाएको प्रहरीले आरोपितलाई केन्द्रमा राखेर झण्डै २८ दिन अनुसन्धान गरेको थियो ।आखिरमा उनीहरू नै शाहीको हत्यामा संलग्न भएको प्रमाणित भएपछि प्रहरीले दैलेख जिल्ला अदालतमा कर्तव्य ज्यानसम्बन्धी कसुरमा मुद्दा दर्ता गरेको छ । महावु गाउँपालिका–५, काँशीकाध बस्ने २७ वर्षीय गंगासहित उनका बुवा नैने र आमा भकुविरुद्ध अदालतमा मुद्दा दर्ता गरिएको जिल्ला प्रहरी कार्यालय दैलेखले जानकारी दिएको छ ।