सञ्जालहब
११ भदौ- विराटनगर, जग्गा सम्बन्धी विवादका कारण किरियापुत्रीमाथि आक्रमण भएको छ ।
विराटनगर–११ मा रहेको कित्ता नम्बर ८८ को एक कठ्ठा जग्गामा ३५ वर्षदेखिको विवाद झिकेर त्यही जग्गामा बस्दै आएका हरिनारायण कामतको परिवारमाथि आक्रमण भएको हो ।
परिवारलाई उक्त जग्गाबाट हटाउन पटक–पटक धम्की दिने र मानसिक तनाव दिने गरेको परिवारको आरोप छ । विराटनगर महानगरपालिका–११ स्थित पिचरामा किरियापुत्री बसिरहेका परिवारमाथि मध्यरातमा हमला भएको थियो । सोमबार राति करिब ११ बजेपछि मृतकको घरमा किरियापुत्री बसिरहेका अवस्थामा स्थानीय प्रमोद सहनी र सुनील सहनी मदिरा सेवन गरेर घरभित्र पसेर आक्रमण गरेका हुन।
मृतकका श्रीमान् हरिनारायण कामत र उनका छोराहरू किरण कामत, सन्तोष कामत, छोरी काली कामत कुटपिटबाट घाइते भएका हुन । किरण सात दिनदेखि आमाको किरियामा थिए ।
पीडित परिवारले प्रहरीलाई खबर गरे लगतै प्रहरीको टोली घटनास्थल पुगेको थियो । तर, प्रहरी आइपुग्नुअघि नै आक्रमणकारीद्वय प्रमोद र सुनील फरार भइसकेका थिए । त्यसपछि वडा प्रहरी कार्यालय विराटनगरबाट प्रहरी सहायक निरीक्षकको नेतृत्वमा थप टोली आयो र राति १ बजे सुनीलको घरमा छापा मार्यो । तर, उनी त्यहाँ फेला परेनन् ।
मंगलबार बिहान पीडित परिवारले जिल्ला प्रहरी कार्यालय, मोरङमा दुवै आक्रमणकारीविरुद्ध अभद्र व्यावहारको मुद्दामा किटानी जाहेरी दिएका थिए । उजुरी दर्ता भएलगत्तै मोरङ प्रहरीले दुवै जनालाई नियन्त्रणमा लिएको छ ।
प्रतिक्रिया दिनुहोस्