एमालेले कुलिङ पिरियडको विपक्षमा संशोधन हालेको प्रति शेखर कोइरालाको आपत्ति

४ साउन- काठमाडौं, राष्ट्रियसभामा विचाराधीन बहुचर्चित संघीय निजामती विधेयकमा कुलिङ पिरियडको विपक्षका बारे प्रमुख सत्तारुढ नेकपा एमालेका सांसदहरूले संशोधन हालेकोप्रति नेपाली कांग्रेसका नेता डा. शेखर कोइरालाले आपत्ति जनाएका छन् ।

एमालेका पाँचजना सांसदहरूले उक्त विधेयकमा संशोधन प्रस्ताव हालेको सार्वजनिक भएपछि कोइरालाले आइतबार साँझ सामाजिक सञ्जालमार्फत् आफ्नो यस प्रति आपत्ति प्रकट गरेका छन ।

‘नेकपा एमालेका सांसदहरुले राष्ट्र्यिसभामा संघीय निजामती विधेयकमा हालेको संशोधन आपत्तिजनक छ’, ‘गठबन्धनका दलबीच भएको सहमति र समितिमा भएको सर्वसम्मतिविपरीत यसरी आफ्ना सांसदहरूलाई संशोधन हाल्न लगाउनु एमालेको दोहोरो चरित्र मात्रै नभई उसले देश, जनता, लोकतन्त्र र गठबन्धनलाई दिएको धोका पनि हो ।’ उनले भनेका छन्,

यसबारेमा कोइरालाले कांग्रेसले एमालेको आधिकारिक धारणा माग गर्नुपर्ने बताए । ‘सबै मिलेर एमालेले हालेको संशोधन पास हुन दिनु हुन्न । कुलिङ पिरियड रहन्छ, रहन्छ र रहन्छ । कोही द्विविधामा नपरे हुन्छ ।’

एमालेबाट राष्ट्रिय सभाका ५ जना सांसदले कुलिङ पिरियडको विपक्षमा संशोधन हालेका हुन । उनीहरूले निजामती सेवामा ‘कुलिङ पिरियड’ लागु गर्ने प्रावधान नराखी ऐन बनाउनुपर्ने प्रस्ताव गरेका छन् ।