ईभी गाडीले ठक्कर दिँदा पठाओ चालकको मृत्यु

२५ असार- काठमाडौँ, ईभी गाडीले ठक्कर दिँदा टोखामा पठाओ चालकको मृत्यु भएको छ।

टोखा नगरपालिका ६ ग्राण्डि सडक खण्डमा बा.प्र.०१ ००२ ज ७३७८ नम्बरको ईभी माइक्रोले बा.प्र.०२ ०४४ प ६४०५ नम्बरको स्कुटरलाई ठक्कर दिँदा २४ वर्षीय सर्लाहीको हरिवन नगरपालिका(१ बिलन्दी घर भइ हाल भक्तपुरको थलीमा बस्दै आएका २४ वर्षीय सोनाम योञ्जनको मृत्यु भएको छ। यो घटना मंगलबार दिउँसो साढे ३ बजेतिरको हो।

दुर्घटनामा गम्भीर घाइते भएका उनको उपचारको क्रममा ग्राण्डी अस्पताल टोखामा मृत्यु भएको हो। ्उनको शव हाल ग्राण्डी अस्पतालमा राखिएको छ।

तर, मृतकका बुवा राजकुमार योञ्जनले भने घटना शंकास्पद देखिएको बताएका छन्। आफ्नै लेनमा रहेको स्कुटरलाई अगाडीबाट आएको माइक्रोले ठक्कर दिँदा छोराको मृत्यु भएको उनले बताएका छन।

घटनाको निष्पक्ष छानविन गरि दोषीमाथि कारबाहीको माग गर्दै पीडित पक्षले शव बुझन् मानेका छैनन्। मलेसियामा रोजगारी गरेर स्वदेश फर्किएका सोनामले एक वर्षदेखि काठमाडौँमा पठाओ चलाउँदै आएका थिए।