अवैध लागूऔषध सहित विभिन्न स्थानबाट ९ जना पक्राउ

२० जेठ – काठमाडौं, त्रिभुवन अन्तर्राष्ट्रिय विमानस्थलको अन्तर्राष्ट्रिय आगमन भन्सार एरियाबाट अवैध लागूऔषध गाँजा जस्तो देखिने वस्तु करिब १० किलो ४ सय २० ग्राम सहित २ जना सोमबार राति पक्राउ परेका छन् । पक्राउ पर्नेहरूमा थाइल्याण्डका नागरिक ४३ वर्षीय  SOMSAK PATCHA र भारतीय नागरिक २९ वर्षीय PEREIRA GIFFIN रहेका छन् । त्रिभुवन अन्तर्राष्ट्रिय विमानस्थल सुरक्षा कार्यालय र भन्सार कार्यालयबाट खटिएको संयुक्त टोलीले नेपाल एयरलाइन्सको उडानद्वारा बैंककबाट काठमाडौं आएका उनीहरूलाई जाँच गर्ने क्रममा SOMSAK PATCHA  को साथबाट ७ किलो ३ सय १० ग्राम र PEREIRA GIFFIN  को साथबाट ३ किलो १ सय १० ग्राम गाँजा जस्तो देखिने वस्तु फेला पारी पक्राउ गरेको हो । उनीहरूलाई आवश्यक अनुसन्धान तथा कारवाहीको लागि लागूऔषध नियन्त्रण ब्यूरो पठाइएको छ ।

कैलाली, भजनी नगरपालिका-२ रजवाराबाट अवैध लागूऔषध ब्राउनसुगर जस्तो देखिने पदार्थ ३ सय १० मिलिग्राम सहित सोही नगरपालिका-२ शिबिर बस्ने २२ वर्षीय शंकर चौधरी समेत २ जनालाई सोमबार साँझ प्रहरीले पक्राउ गरेको छ ।  इलाका प्रहरी कार्यालय भजनीबाट खटिएको प्रहरीले सु.प.प्र.०१-००८ प ४२१ नम्बरको मोटरसाइकललाई जाँच गर्न क्रममा  मोटरसाइकलमा सवार उनीहरूलाई उक्त पदार्थ सहित पक्राउ गरेको हो ।

यसैगरी कैलाली, टिकापुर नगरपालिका-१ ब्लक नम्बर ११ ड्राईभरटोलबाट अवैध लागूऔषध ब्राउनसुगर जस्तो देखिने पदार्थ १ सय १० मिलिग्राम सहित सोही ठाउँ बस्ने ३३ वर्षीय आशिष कोराललाई सोमबार साँझ प्रहरीले पक्राउ गरेको छ । इलाका प्रहरी कार्यालय टिकापुरबाट खटिएको प्रहरीले उनलाई उक्त पदार्थ सहित पक्राउ गरेको हो ।

बाँके, नेपालगंज उपमहानगरपालिका-१५ जमुनाहबाट अवैध लागूऔषध ब्राउनसुगर जस्तो देखिने पदार्थ ४ ग्राम ७ सय ७० मिलिग्राम सहित जानकी गाउँपालिका-५ बस्ने २५ वर्षीय रियाजुदिन हलुवाईलाई सोमबार दिउँसो प्रहरीले पक्राउ गरेको छ । इलाका प्रहरी कार्यालय जमुनाह र लागूऔषध नियन्त्रण ब्यूरो शाखा कार्यालय नेपालगंजबाट खटिएको प्रहरीले भारतबाट नेपालतर्फ आउँदै गरेका उनलाई उक्त लागूऔषध सहित पक्राउ गरेको हो ।

झापा, अर्जुनधारा नगरपालिका-६ कप्तानबारीबाट अवैध लागूऔषध ब्राउनसुगर जस्तो देखिने पदार्थ ३ सय मिलिग्राम सहित २ जनालाई सोमबार राति प्रहरीले पक्राउ गरेको छ । पक्राउ पर्नेहरूमा अर्जुनधारा नगरपालिका-६ बस्ने ३५ वर्षीय राम बहादुर दनुवार र मेचीनगर नगरपालिका-३ दोकान डाँडा बस्ने ३२ वर्षीय अनिल दनुवार रहेका छन् । प्रहरी चौकी शनिश्चरेबाट खटिएको प्रहरीले राम बहादुरको घर तलासी गर्दा उक्त पदार्थ फेला पारी उनीहरूलाई पक्राउ गरेको हो ।

मोरङ, उर्लाबारी नगरपालिका-१ हिलेडाँगी बस्ने ३१ वर्षीय सनम माझीलाई नियन्त्रित लागूऔषध ट्रामाडोल ७ सय ट्याब्लेट र नगद २ हजार १ सय रूपैयाँ सहित सोमबार राति प्रहरीले पक्राउ गरेको छ । इलाका प्रहरी कार्यालय उर्लाबारीबाट खटिएको प्रहरीले उनको घर तलासी गर्दा उक्त लागूऔषध फेला पारी पक्राउ गरेको हो ।

यस सम्बन्धमा प्रहरीले आवश्यक अनुसन्धान गरिरहेको छ ।