ड्रोन तथा अन्य पाइलटविहीन खेल–गतिविधिको नियमन गर्न युवा तथा खेलकुद मन्त्री आग्रह

११ मंसिर- काठमाडौँ, मानवरहित विमान संघ नेपालले नेपालमा भइरहेको अनियमित ड्रोन तथा अन्य पाइलटविहीन खेल–गतिविधिको नियमन गर्न युवा तथा खेलकुद मन्त्री संग भेटेर माग गरेको छ ।

संघका पदाधिकारीहरूले युवा तथा खेलकुद मन्त्री बब्लु गुप्तासँग बिहीबार भेट गरी देशका विभिन्न स्थानहरूमा ड्रोन रेसिङ तथा पानी र हावामा सञ्चालन गरिने पाइलटविहीन उपकरणहरू बिना कुनै स्पष्ट मापदण्ड सञ्चालन हुँदै आएको बताएका छन । सुरक्षादेखि खेलको मर्यादा तथा अनुशासनसम्म नकारात्मक प्रभाव पारिरहेकोप्रति उनीहरूले मन्त्रीको ध्यानाकर्षण गराएका छन । यस्ता गतिविधिको नियमन, अनुमति प्रक्रिया, निरीक्षण तथा सञ्चालन-अनुगमन कार्य केवल सरकारी निकायमा सीमित नराखी, प्राविधिक दक्षता भएका गैर-सरकारी संस्थालाई जिम्मेवारीसाथ प्रदान गर्नुपर्ने उनीहरूको भनाइ छ ।

नेपाल क्रिकेट संघले क्रिकेट खेलको सम्पूर्ण संरचना र व्यवस्थापन सम्हालेजसरी मानवरहित विमान–सम्बन्धी खेल तथा गतिविधिको औपचारिक संरचना संघ जस्ता विशेषज्ञ संस्थाले वहन गर्न सक्ने सुझाव दिइएको संघले जनाएको छ ।

प्रविधिमूलक खेलहरूलाई मन्त्रालयले आफ्नो संरचनाभित्र समावेश गर्नुपर्ने र राज्यको औपचारिक सहयोगले मात्र नेपालमा टेक्नोलोजिकल स्पोर्ट्सलाई विश्वस्तरीय स्तरमा उकास्न सकिने धारणा व्यक्त गरिएको छ ।